Navn og heimstaður

1.grein

Navn felagsins er Felag Tænastumanna Landsins. Tess heimstaður og tingstaður er Tórshavn.

Endamál

2. grein

Endamál felagsins er at fylkja allar tænastumenn landsins og tænastumannalíknandi sett fólk í umsitingini, fyri at fremja og verja felags áhugamál, at hevja fíggjarligu og stættarligu støðu limanna og  at skapa tíðarhóskandi viðurskifti í øllum førum innan stættin. Felagið tekur ikki lut í partapolitikki.

Innliman.

3.grein

Øll, sum nevnd eru í 2. grein, kunnu gerast limir við at venda sær til formannin ella kassameistarin.
Nevndin ger av um umsøkjari lýkur treytirnar í 2. grein.

Limagjald og onnur gjøld.

4. grein

Goldið verður felagnum árliga 1 % av lønini írokna viðbøtur. Gjaldið kann broytast á vanligum ársaðalfundi hvørt ár.
Við enda álmanakkaársins verður burturav hesum gjaldi goldið til samlagstrygging hins einstaka lims, tann av tryggingin ásetta premia. Tað sum tá er eftir av gjaldinum er limagjald til felagið.
Eftirløntir tænastumenn rinda 4 kr./md. í limagjald.
Nevndin ger av ivaspurningar um gjaldskyldu. Somuleiðis ger nevndin av, hvussu limagjaldið verður kravt. Tann limur, sum skyldar limagjald og hevur havt høvi til at rinda, missir sín atkvøðurætt á fundi, og er støðan óbroytt til fyrsta fund, verður hann at koma undir tær í 5. grein tilskilaðu treytir. 

Skylda limanna.

5. grein

Tað er skylda limana sum einstaklingar og sum felagslimir at virka fyri endamáli felagsins, sbr. 2. grein.
Limirnir hava skyldu til at gera seg kunnugar við lógir felagsins, ið altíð skulu vera tøkar at fáa hjá nevndini. Tørvandi kunnleiki til lógirnar loysir í ongum føri lim frá skyldum hansara mótvegis felagnum.
Nevndin kann taka limarættin frá limi til fyrsta fund, um hann ikki fylgir hesi lóg, og ger fundurin av um hann skal verða beindur úr felagnum fyri styttri ella longri tíð.

Nevndin.

6. grein

Felagið verður stjórnað av 4-manna nevnd. Ársaðalfundurin velur formannin, sum skal verða tænastumaður, beinleiðis fyri 2 ár. Uppskot til formansvalevni skal verða nevndini skrivliga í hendi innan 1. februar. Valevni til formann skulu váttað uppstillingina.
Lønarbólkarnir  16 – 26, 27 – 35 og 36 – 40 skulu verða umboðaðir av 1 limi í nevndini. Nevndin verður vald fyri 2 ár millum limirnar. Formaðurin situr altíð í 2 ár. 
Nevndin stendur aðalfundinum til svars fyri tað, hon avrikar, somuleiðis fyri óavrikaðar felagssamtyktir.
Nevndin velur sínámillum næstformann og skrivara, ið ikki nýtist at vera nevndarlimur. Næstformaðurin røkir starv formansins, tá ið honum berst undan. Skrivarin førir allar nevndarfundir í felagsins gerðabók. Hon skal ið hvussu so er lýsa allar avgerðir hjá nevndini og skal verða undirskrivað av teimum nevndarlimum, sum eru á fundi. Berst nevndarlimi undan, skal hann siga nevndini frá frammanundan fundinum. Møtir hann ikki á trimum fylgjandi fundum og hevur ikki lógliga umbering at føra fram, fer hann úr nevndini, og tiltakslimur kemur í hansara stað.
Allar avgerðir á nevndarfundi verða tiknar við vanligum atkvøðumeiriluta millum teir møttu limirnar. Stendur á jøvnum hevur formaðurin avgerandi atkvøðuna. 
Fyri starv sítt fær formaðurin eina samsýning sum nevndin ásetur.
Fyri nevndarfundir fáa nevndarlimir fundar- og ferðapening sambært reglugerð hjá landsstýrinum.

Kassameistari

7. grein

Nevndin velur kassameistara, sum ikki nýtist at vera nevndarlimur. Kassameistarin heldur roknskap felagsins, krevur inn limagjald og rindar útreiðslur felagsins eftir ávísing formansins. Undan 1. februar letur hann ársroknskapin til grannskoðaran at grannskoða. Fyri starv sítt fær kassameistarin eina samsýning, sum nevndin ásetur.
Roknskaparárið er álmanakkaárið.

Roknskapargrannskoðarin.

8. grein

Ársaðalfundurin velur ein roknskapargrannskoðara, ið ikki er nevndarlimur. Hann grannskoðar roknskap felagsins og vissar seg um at ognir felagsins er til.
Ársroknskapin skal hann lata frá sær til nevndina innan ársaðalfundin.

Aðalfundurin.

9. grein

Ársaðalfundurin er hægsti myndugleiki felagsins. Nevndin boðar til aðalfundar við 8 daga ávaring í minst einum av teimum føroysku bløðunum ella við skrivligum boðum til teir einstøku limirnar.
Aðalfundurin er altíð viðtøkuførur, tá ið hann er lógliga boðaður.
Øll uppskot og val á aðalfundinum verða avgjørd við vanligum atkvøðumeiriluta. Hvør limur hevur eina atkvøðu. Stendur á jøvnu fellur málið. Fundurin kann avgera at atkvøðugreiðsla skal vera skrivlig og loynilig. Fundurin avgerð, um mál, sum limir hava lagt fyri hann, skulu viðgerast
Aðalfundurin verður stjórnaður av orðstýrara, sum fundurin velur. Orðstýrarin førir í gerðabók felagsins fundin og undirskrivar hana.
Vanligur ársaðalfundur verður hildin á hvørjum árið í februar mánað við hesi dagsskrá:

1. Frásøgn formansins frá farna árinum.
2. Framløga av grannskoðaðum ársroknskapi til góðkenningar.
3. Møgulig uppskot frá nevndini og limum.
4. Val av formanni.
5. Val av nevndarlimum og tiltakslimum.
6. Val av roknskapargrannskoðara.
7. Ymiskt.

Fundurin kann eftir áheitan frá nevndini víkja frá raðfylgjuni.

Eykaaðalfundur.

10. grein

Boða verður til eykaaðalfund, tá ið nevndin heldur tað vera neyðugt ella tá ið
Minst ¼ av limatalinum krevja tað. Tílík áheitan má vera skrivlig og má tilskila tey mál, sum ynskjast viðgjørd.

Avtøka felagsins.

11. grein

Felagið kann bert avtakast eftir reglunum í lóg um tænastumenn landsins, og ger aðalfundurin tá av hvussu ognir felagsins skulu nýtast.

Lógarbroyting.

12. grein

Lógarbroyting kann bert verða gjørd á aðalfundi, tá lýst verður til tess.

13. grein

Alt sum hesar lógir greinliga tilskila, ger nevndin av við ábyrgd mótvegis aðalfundinum.